महाराष्ट्र शासनाच्या क्रीडा विभागाने युवा खेळाडूंना आंतरराष्ट्रीय स्तरावर चमकण्याची सुवर्णसंधी दिली आहे. ‘मिशन लक्ष्यवेध’ योजनेअंतर्गत पुणे विभागीय निपुणता केंद्रांमध्ये मैदानी (ॲथलेटिक्स), आर्चरी, बॅडमिंटन, हॉकी, रायफल शूटींग, रोईग, कुस्ती आणि टेबल टेनिस या आठ खेळांसाठी प्रत्येकी २० खेळाडूंची निवड करण्यात येणार आहे.
पात्र खेळाडूंनी आपले अर्ज १७ मार्च २०२६ पर्यंत विभागीय उपसंचालक, पुणे विभाग, क्रीडा संकुल, येरवडा किंवा deputypune@gmail.com या ई-मेलवर सादर करावेत.
निकष:
वयोमर्यादा: २५ वर्षे (३१ डिसेंबर रोजी)
आवश्यक कागदपत्रे: जन्म दाखला, शाळा सोडल्याचे प्रमाणपत्र, अधिवास प्रमाणपत्र, आधार कार्ड, गेल्या दोन वर्षातील क्रीडा कामगिरी प्रमाणपत्र, पासपोर्ट आकाराचे ३ छायाचित्रे इत्यादी
क्रीडा कामगिरी: राज्य/राष्ट्रीय स्तरावरील प्राविण्य किंवा राष्ट्रीय स्तरावर सहभागी (SGFI, AFI, खेलो इंडिया)
वैद्यकीय फिटनेस: शासन मान्यताप्राप्त डॉक्टरांचे प्रमाणपत्र आवश्यक
निवड झालेल्या खेळाडूंना तज्ज्ञ प्रशिक्षकांकडून प्रशिक्षण, निवासी सुविधा, आहार, क्रीडा साहित्य आणि देश-विदेशातील स्पर्धांमध्ये सहभाग खर्च पुरवला जाईल.
उपसंचालक युवराज नाईक म्हणाले, “या योजनेमुळे पुणेतील युवा खेळाडूंना जागतिक स्तरावर चमकण्याची संधी मिळेल. शिवछत्रपती क्रीडा संकुल, म्हाळुंगे, बालेवाडी येथे या निपुणता केंद्राचे आयोजन केले गेले आहे.”
