ससून सर्वोपचार रुग्णालयासाठी आवश्यक असलेल्या परिचारिका आणि चतुर्थ श्रेणी कर्मचाऱ्यांची भरती प्रक्रिया पुढील आठ दिवसांत सुरू करण्याचे आश्वासन वैद्यकीय शिक्षण विभागाच्या राज्यमंत्री माधुरी मिसाळ यांनी विधानसभेत दिले. ससून शासकीय रुग्णालयात औषधांचा तुटवडा होत असल्याची तक्रार होती. या पार्श्वभूमीवर नुकतेच १२ कोटी ९४ लाख रुपयांची रुपयांची औषध खरेदी करण्यात आली आहे. तसेच उपकरणांची देखील खरेदी करण्यात आली. तर जिल्हा नियोजन समितीकडे आणखी औषध खरेदीची मागणी केली आहे, असे मिसाळ यांनी सांगितले. आमदार कांबळे म्हणाले, संपूर्ण पश्चिम महाराष्ट्र व परिसरातील हजारो रुग्ण ससून येथे उपचारासाठी येतात.
मात्र, या रुग्णालयातील आरोग्य सेवा, पायाभूत सुविधा आणि प्रशासकीय व्यवस्थेत अनेक गंभीर समस्या आहेत. रुग्णालयातील वैद्यकीय उपकरणे, शस्त्रक्रियासाठी लागणारी साधनसामग्री आणि औषधांचा तुटवडा वारंवार जाणवतो आहे.
अत्यावश्यक सेवा, विशेषतः आपत्कालीन विभाग व सर्जरी विभाग, योग्य प्रकारे कार्यरत नसल्यामुळे रुग्णांना खासगी रुग्णालयांवर अवलंबून राहावे लागते. यामुळे गरीब व गरजू रुग्णांना मोठ्या आर्थिक अडचणींना सामोरे जावे लागत आहे. रुग्णालयातील स्वच्छता व्यवस्थापन अत्यंत असमाधानकारक आहे. वॉर्ड व ओपीडी विभागात स्वच्छतेचा अभाव असल्याचे कांबळे यांनी सभागृहाच्या निदर्शनास आणले.
उत्तर देताना राज्यमंत्री मिसाळ म्हणाल्या की, ससून बाबत उपस्थित करण्यात आलेले प्रश्न ही वस्तुस्थिती आहे. ससून रुग्णालयात २ हजार ३५० पदे मंजूर असून त्यातील ७८९ पदे रिक्त आहेत. परिचारकांची १६० पदे रिक्त आहेत. चतुर्थ श्रेणीची ५० टक्के पदे रिक्त आहेत. त्यामुळे रुग्णालयाच्या कामावर ताण येत आहे. चतुर्थश्रेणी कामगार पदे ‘टीसीएस’च्या माध्यमातून जिल्हाधिकारी कार्यालयाने भरण्याचे आदेश आहेत. अद्याप ही भरती झालेली नाही. मात्र, पुढील आठ दिवसात ही भरती प्रक्रिया पूर्ण करण्यात येईल.