२०२४-२५ या शैक्षणिक वर्षात आदर्श आश्रमशाळा प्रवेश परीक्षेत सहभागी होण्याचे विद्यार्थांना आवाहन

आदिवासी विकास विभागाच्या नाशिक विभागांतर्गत असलेल्या आदर्श आश्रमशाळा, देवमोगरा ता. नवापुर, जि. नंदुरबार (नंदुरबार प्रकल्प) येथे सन २०२५-२६ या शैक्षणिक वर्षात इयत्ता ५ वी मध्ये अनुसुचित जमातीच्या विद्यार्थ्यांच्या प्रवेशासाठी प्रवेश परिक्षा दिनांक १३ एप्रिल, २०२५ रोजी सकाळी ११.०० ते १२.३० या वेळेत आयोजित करण्यात आली आहे.

जे अनुसूचित जमातीचे विद्यार्थी सन २०२४-२५ या शैक्षणिक वर्षामध्ये इयत्ता ४ थी च्या वर्गात शिकत असून परीक्षेला बसणार आहेत. व पुढील वर्षी इयत्ता ५ वी मध्ये प्रवेश घेणार आहेत. अशा विद्यार्थ्यांकरीता शासकीय माध्यमिक आश्रमशाळा, गंगापूरी, ता. जामनेर, जि. जळगाव. व शासकीय माध्यमिक आश्रमशाळा, दहिवद, ता. अमळनेर, जि. जळगांव. या दोन केंद्रांवर परिक्षेचे आयोजन करण्यात आले आहे.

जे अनुसूचित जमातीचे विद्यार्थी आदर्श आश्रमशाळा, देवमोगरा ता. नवापुर, जि. नंदुरबार (नंदुरबार प्रकल्प) मध्ये प्रवेश घेवू इच्छीतात अशा विद्यार्थ्यांनी आपल्या शाळेतील मुख्याध्यापका मार्फत प्रकल्प अधिकारी, एकात्मिक आदिवासी विकास प्रकल्प, यावल, जि. जळगांव यांचे कडे दिनांक ५ फेब्रुवारी, २०२५ पर्यंत अर्ज सादर करायचे आहे.

ही परिक्षा शासकीय आश्रमशाळा, अनुदानित आश्रमशाळा, जिल्हा परिषद शाळेत शिक्षण घेत असलेले इ. ४ थीत शिकत असलेल्या अनुसूचित जमातीच्या विद्यार्थ्यां करीता पूर्णतः खुली आहे तसेच परिक्षा पूर्व माध्यमिक शिष्यवृत्ती परिक्षा धर्तीवर आधारीत आहे.

प्रवेश घेऊ इच्छुक विद्यार्थ्यांच्या पालकांचे वार्षिक कमाल उत्पन्न एक लाखाच्या आत असावे. इच्छुक विद्यार्थ्यांच्या पालकांना प्रवेश परिक्षेचा अर्ज, गटशिक्षण अधिकारी, पंचायत समितीच्या कार्यालयातून किंवा या कार्यालयात मिळतील. जास्तीत जास्त अनुसूचित जमातीच्या विद्यार्थ्यांनी या योजनेचा लाभ घ्यावा असे आवाहन प्रकल्प अधिकारी अरुण पवार यांनी केले आहेत.