आरोग्य विभागातील पदनिर्मितीसाठी शासनाचा हिरवा कंदील; आयुक्तालयाकडून शासन परिपत्रक जारी

राज्याच्या आरोग्य विभागात पदनिर्मिती प्रक्रियेला गती मिळण्याची शक्यता निर्माण झाली आहे. आरोग्य सेवा आयुक्तालय, मुंबई यांनी त्यांच्या अखत्यारितील विविध कार्यक्रम प्रमुखांच्या आकृतीबंधानुसार पदनिर्मितीबाबतचा शासन निर्णय उपलब्ध करून दिल्याची माहिती अधिकृत पत्राद्वारे कळविण्यात आली आहे.

आरोग्य सेवा आयुक्तालयाकडून सर्व कार्यक्रम प्रमुखांना पाठविण्यात आलेल्या पत्रात नमूद करण्यात आले आहे की, आयुक्तालयाच्या अखत्यारितील सर्व कार्यक्रम प्रमुखांचा आकृतीबंध तयार करून शासनास सादर करण्यात आला होता. या संदर्भात शासनाने यापूर्वी काही त्रुटी काढून त्या दुरुस्त करण्याबाबत सूचना केल्या होत्या.

या पार्श्वभूमीवर संबंधित त्रुटींची पूर्तता करण्यासाठी आकृतीबंधाशी संबंधित पदांच्या पदनिर्मितीचा शासन निर्णय उपलब्ध करून देण्यात आला आहे. त्यानुसार आयुक्तालयाच्या स्तरावर हा निर्णय संबंधितांना उपलब्ध करून देण्यात आला आहे.

यासंदर्भातील शासन निर्णय आयुक्तालयाच्या dhsdesk5@gmail.com या ई-मेल आयडीवर उपलब्ध करून देण्यात आला असल्याचे पत्रात नमूद करण्यात आले आहे.

या निर्णयामुळे आरोग्य विभागातील विविध कार्यक्रमांसाठी आवश्यक असलेल्या पदनिर्मिती प्रक्रियेला चालना मिळण्याची शक्यता व्यक्त होत आहे.