महाराष्ट्रातील जनतेसाठी एक अत्यंत दिलासादायक बातमी समोर आली आहे. राज्य मार्ग परिवहन महामंडळाने (MSRTC) दिवाळी सणानिमित्त दरवर्षी केली जाणारी 10 टक्के हंगामी भाडेवाढ अखेर रद्द करण्याचा महत्त्वपूर्ण निर्णय घेतला आहे. महाराष्ट्राचे उपमुख्यमंत्री एकनाथ शिंदे यांच्या सूचनेनंतर परिवहन मंत्री प्रताप सरनाईक यांनी तत्काळ एसटी प्रशासनाला ही भाडेवाढ मागे घेण्याचे आदेश दिले.
लवकरच महामंडळाकडून या संदर्भात अधिकृत घोषणा होण्याची शक्यता आहे. दरवर्षी दिवाळीच्या सणासुदीच्या काळात म्हणजेच 15 ऑक्टोबर ते 5 नोव्हेंबर या दरम्यान, एसटीच्या तिकिट दरामध्ये ही 10 टक्के भाडेवाढ लागू केली जात होती. मात्र गेल्या काही दिवसांत महाराष्ट्रातील अनेक जिल्ह्यांमध्ये आलेल्या भीषण पूर परिस्थितीमुळे नागरिकांचे मोठे नुकसान झाले आहे.
अनेक लोक संकटात सापडले आहेत आणि त्यांचे जनजीवन विस्कळीत झाले आहे. ही गंभीर परिस्थिती लक्षात घेऊन उपमुख्यमंत्री एकनाथ शिंदे यांनी परिवहन विभागाला ही हंगामी भाडेवाढ रद्द करण्याची सूचना केली. त्यांच्या सूचनेनंतर मंत्री प्रताप सरनाईक यांनी तातडीने कार्यवाही केली.
एसटी महामंडळाचा हा निर्णय पूरग्रस्त भागातील नागरिकांसह संपूर्ण महाराष्ट्रातील सर्वसामान्य प्रवाशांसाठी एकप्रकारे दिवाळी भेट ठरला आहे. या निर्णयामुळे प्रवाशांना दिवाळीच्या काळात गावी जाण्यासाठी दिलासा मिळेल आणि त्यांच्यावरील आर्थिक ताण कमी होईल. अशा प्रकारे राज्य सरकारने सध्याच्या संकटकाळात नागरिकांच्या बाजूने उभे राहून संवेदनशीलता दाखवली आहे.