मुख्यमंत्री एकनाथ शिंदे यांनी राज्यभरामध्ये ४० हजार पदांची मेगा भरती करण्याबाबत केलेली घोषणा महापालिकेच्या पथ्यावर पडली असून यापूर्वी प्रक्रिया सुरू असलेल्या ७०६ पदांबरोबर प्रशासकीय, लेखा व लेखापरीक्षण तसेच तांत्रिक संवर्गामधील जवळपास १८०० पदे असे मिळून जवळपास अडीच हजार जागांच्या नोकरभरतीसाठी प्रशासनाने टॉप गिअर टाकला आहे.
प्रशासकीय लेखा व लेखापरीक्षण तसेच तांत्रिक संवर्गामधील नोकरभरतीसाठी येथे आठ दिवसांमध्ये सेवा प्रवेश नियमावली मंजूर केली जाणार असून पालिकेने त्या दृष्टीने नगर विकास खात्याकडे प्रस्ताव पाठवण्याची तयारी सुरू केली आहे. नाशिक शहराचा झपाट्याने विकास होत असून शहराची लोकसंख्या वीस लाखापार झाली आहे. लोकसंख्या वाढत असल्याने महापालिकेची ”ब” वर्गामध्ये पदोन्नती झाली आहे.
मात्र सद्यस्थितीमध्ये ”क” वर्ग आकृतिबंधानुसारच ७०८४ पदांपैकी ४५०० अधिकारी व कर्मचारी कार्यरत आहेत. वाढता आस्थापना खर्च, सुधारीत आकृतिबंध आणि सेवा प्रवेश नियमावलीच्या अडथळ्यांमुळे रिक्त पदांची संख्या २८००वर गेली आहे. त्यामुळे शहराला सोयी सुविधा पुरवताना पालक संस्था म्हणून महापालिकेला अडचणी येत असून ही बाब लक्षात घेत मध्यंतरी नगर विकास खात्याने अत्यावश्यक अशा विभागातील ८७५ नवीन पदांना शासनाने मंजुरी दिली.
मात्र, सेवा प्रवेश नियमावलीचा प्रस्ताव शासन दरबारी प्रलंबित असल्याने नोकरभ रतीची प्रक्रिया रखडली होती. नगरविकास विभागाने अग्निशमन विभागातील ३४८ पदे आणि आरोग्य व वैद्यकीय विभागातील ३५८ अशा ७०६ पदासाठीची सेवा प्रवेश नियमावली मंजूर केल्यानंतर पुढील प्रक्रियेसाठी आयबीपीएस संस्थांची नियुक्ती झाली. बुधवारी राज्यातील प्रमुख आयुक्तांची मुख्यमंत्र्यांनी बैठक घेत प्रामुख्याने नोकरभरतीच्या दृष्टिकोनातून आढावा घेतला. त्यात राज्यभरात जवळपास ४० हजार अधिकारी व कर्मचाऱ्यांची पदे भरणे आवश्यक असल्याची बाब पुढे आली.
नाशिक महापालिकेत २८०० पदे रिक्त असून त्यापैकी ७०६ पदांच्या भरतीसाठी मान्यता मिळाली आहे मात्र उर्वरित सुमारे १८०० पदांबाबत कारवाई करणे गरजेचे असल्याची बाब आयुक्त डॉ. चंद्रकांत पुलकुंडवार यांनी मांडल्यानंतर नगरविकास खात्याकडे पाठपुरावा करण्याबाबत सूचना देण्यात आल्या.
यानुसार आता प्रशासकीय लेखा व लेखापरीक्षण विभाग आणि तांत्रिक संवर्गांमधील सर्व पदे भरण्यासं दर्भातील सेवा प्रवेश नियमावली मंजुरीसाठी पाठवली जाणार आहे. २८०० पदे भरण्याचा प्रयत्न १८०० पदे भरतीसाठी आवश्यक सेवा प्रवेश नियमावली तयार करून मंजुरीसाठी नगर विकास कडे पुढील आठवड्यामध्ये पाठवली जाईल. या व्यतिरिक्त, लाड पागे समिती तसेच अनुकंपा तत्त्व आणि अन्य माध्यमामधून पदेही भरली जातील. – डॉ. चंद्रकांत पुलकुंडवार, आयुक्त