NEET पुनर्परीक्षेआधी केंद्र सरकारचा मोठा निर्णय; भारतात टेलिग्राम ॲपवर तात्पुरती बंदी!

नवी दिल्ली: ‘नीट-यूजी २०२६’ (NEET-UG 2026) च्या पुनर्परीक्षेपूर्वी केंद्र सरकारने एक अत्यंत मोठा आणि महत्त्वपूर्ण निर्णय घेतला आहे. देशात टेलिग्राम (Telegram) या लोकप्रिय मेसेजिंग ॲपवर तात्पुरते निर्बंध लागू करण्यात आले आहेत. नॅशनल टेस्टिंग एजन्सी (NTA) आणि सायबर यंत्रणांच्या शिफारसीनंतर इलेक्ट्रॉनिक्स आणि माहिती-तंत्रज्ञान मंत्रालयाने (MeitY) हा कायदेशीर आदेश जारी केला आहे.

 कधीपर्यंत असणार बंदी?

• भारतात टेलिग्रामचे तब्बल १५ कोटी युजर्स आहेत.

• हा वापर २२ जून २०२६ पर्यंत तात्पुरता बंद करण्यात आला आहे.

• २१ जून रोजी होणाऱ्या नीट-यूजी पुनर्परीक्षेनंतर हे निर्बंध हटवले जातील.

 बंदी घालण्यामागचे मुख्य कारण काय?

परीक्षा काळात पेपरफुटीचे खोटे दावे करणे, कॉपी करणे आणि विद्यार्थ्यांची दिशाभूल करणाऱ्या टोळ्यांवर लगाम घालण्यासाठी ही कारवाई करण्यात आली आहे.

असे निर्माण केले जायचे खोटे पुरावे: टेलिग्रामवरील ‘मेसेज एडिट’ (संदेश संपादन) सुविधेचा गैरवापर करून अनेक रॅकेट सक्रिय होते. एखादी व्यक्ती आधी सामान्य संदेश पाठवायची आणि नंतर परीक्षा संपल्यावर त्यात खरी प्रश्नपत्रिका किंवा पीडीएफ एडिट करून जोडायची. यामुळे ती प्रश्नपत्रिका परीक्षा सुरू होण्यापूर्वीच उपलब्ध होती, असा खोटा दावा केला जात असे.

 ‘मेसेज एडिट’ सुविधेवर ३० जूनपर्यंत स्थगिती

फक्त ॲपवर बंदी नाही, तर टेलिग्रामवरील संदेश संपादन सुविधेला (Message Editing Feature) ३० जून २०२६ पर्यंत स्थगिती देण्यात आली आहे.

• पैसे उकळण्याचा प्रयत्न: ‘पेपर लीक्ड नीट’, ‘री-नीट २०२६’, आणि ‘प्रायव्हेट माफिया’ अशा नावांनी टेलिग्रामवर ग्रुप्स चालवून विद्यार्थ्यांच्या पालकांकडून कोट्यवधी रुपये उकळण्याचे प्रयत्न सुरू होते.

• या खोट्या पुराव्यांमुळे राष्ट्रीय परीक्षांच्या विश्वासार्हतेवर प्रश्नचिन्ह निर्माण होत असल्याने सरकारने हे कडक पाऊल उचलले आहे.

विद्यार्थ्यांनी आणि पालकांनी कोणत्याही अफवांना बळी पडू नये, असे आवाहन प्रशासनातर्फे करण्यात आले आहे.