आपले सरकार पोर्टलद्वारेच ऑनलाइन अर्ज करण्याचे आवाहन – इयत्ता १० वी व १२ वीच्या खेळाडू विद्यार्थ्यांना स्पर्धेतील सहभाग व प्रावीण्यानुसार दिले जाणारे ग्रेस गुण अर्ज यावर्षीपासून (२०२४-२५) शासनाच्या आपले सरकार पोर्टलद्वारे केवळ ऑनलाइन स्वरूपात स्वीकारले जाणार आहेत. यापूर्वी ही प्रक्रिया ऑफलाइन पद्धतीने जिल्हा क्रीडाधिकारी कार्यालयांमार्फत पार पडत होती. तथापि, काही मानवी त्रुटींमुळे अर्ज सादर करण्यास विलंब होत असे किंवा काही विद्यार्थी वंचित राहण्याची शक्यता निर्माण होत असे. यावर प्रभावी उपाययोजना म्हणून २०२४-२५ शैक्षणिक वर्षापासून पूर्ण प्रक्रिया डिजिटल करण्यात आली असून अर्ज करण्यासाठी ‘आपले सरकार’ पोर्टलचा वापर अनिवार्य करण्यात आला आहे.
खेळाडू विद्यार्थ्यांनी आपले सरकार अॅप अथवा पोर्टलच्या माध्यमातून अर्ज ऑनलाइन भरावा. जिल्हा, विभाग, राज्य व राष्ट्रीय स्तरावरील खेळ स्पर्धामधील सहभाग किंवा प्रावीण्य यासाठी सवलत गुण अर्ज ऑनलाइन पद्धतीनेच सादर करावा. अर्जाची प्रत आपले सरकार पोर्टलद्वारे सर्वप्रथम जिल्हा क्रीडाधिकारी कार्यालय नागपूर व त्यानंतर महाराष्ट्र राज्य माध्यमिक व उच्च माध्यमिक शिक्षण मंडळास पोहोचेल, त्यामुळे विद्यार्थ्यांनी किवा शाळांनी प्रत्यक्षपणे अर्ज सादर करू नये. आपले सरकार पोर्टल, अॅपवर लॉगिन करून अर्ज भरणे आवश्यक खेळ व प्रमाणपत्रांची माहिती अपलोड करणे, अर्जाची स्थिती पोर्टलवर नियमित तपासणे याबाबतची नोंद शाळा व महाविद्यालयाच्या शिक्षकांनी घ्यावी. सर्व संबंधितांनी प्रक्रियेनुसारच अर्ज भरावेत, असे आवाहन जिल्हा क्रीडाधिकारी पल्लवी धात्रक यांनी केले आहे.